ବ୍ରହ୍ମପୁର,୪/୪: (ହିମାଂଶୁ ଶେଖର ସାବତ):ବିଦ୍ୟୁତ୍ ସେବା ଯୋଗାଇବାରେ ଅବହେଳା କରିବା ଟାଟା ପାୱାରକୁ ପଡ଼ିଛି ମହଙ୍ଗା । ନୂତନ ସଂଯୋଗ ଦେବାରେ ବିଳମ୍ବ ଯୋଗୁଁ ଜଣେ ମହିଳା ଖାଉଟିଙ୍କୁ ହୋଇଥିବା ମାନସିକ ଓ ଶାରୀରିକ ସମସ୍ୟାକୁ ଗୁରୁତ୍ୱର ସହ ଗ୍ରହଣ କରି ଖାଉଟି କମିଶନ ଏକ ଐତିହାସିକ ରାୟ ଶୁଣାଇଛନ୍ତି। ପ୍ରକାଶ ଥାଉ କି, ଆବେଦନକାରୀ ଶ୍ରୀମତୀ ଅପରମିତା ମଙ୍ଗରାଜ ୨୦୨୪ ମସିହାରେ ଏକ ନୂତନ ବିଦ୍ୟୁତ୍ ସଂଯୋଗ ପାଇଁ ଆବଶ୍ୟକୀୟ ସମସ୍ତ ପ୍ରକ୍ରିୟା ଓ କାର୍ଯ୍ୟ ସମ୍ପୂର୍ଣ୍ଣ କରିଥିଲେ ଏବଂ ଦେୟ ମଧ୍ୟ ପୈଠ କରିଥିଲେ । ମାତ୍ର ଦକ୍ଷିଣ ଓଡ଼ିଶା ବିଦ୍ୟୁତ୍ ବିତରଣ କମ୍ପାନୀ କର୍ତ୍ତୃପକ୍ଷ ଦୀର୍ଘ ଦିନ ଧରି ସଂଯୋଗ ଦେବାରେ ଟାଳଟୁଳ ନୀତି ଅବଲମ୍ବନ କରିଥିଲେ। ଫଳରେ ଆବେଦନକାରୀଙ୍କୁ ଦୀର୍ଘ ସମୟ ଅନ୍ଧକାରରେ ରହିବାକୁ ପଡ଼ିବା ସହ ଅହେତୁକ ମାନସିକ ଦୁଶ୍ଚିନ୍ତା ସହିବାକୁ ପଡ଼ିଥିଲା। ଏହି ଘଟଣାକୁ ନେଇ ସେ ଉପଭୋକ୍ତା ଅଦାଲତଙ୍କ ଦ୍ୱାରସ୍ଥ ହୋଇଥିଲେ (କେସ୍ ନମ୍ବର: DC/354/CC/97/2025)। ଗତ ୯ ମାର୍ଚ୍ଚ, ୨୦୨୬ରେ ଏହି ମାମଲାର ଶେଷ ଶୁଣାଣି କରି ମାନ୍ୟବର କମିଶନ କହିଛନ୍ତି ଯେ,ବିଦ୍ୟୁତ୍ ସେବା ଏକ ମୌଳିକ ଅଧିକାର,ବିଦ୍ୟୁତ୍ କେବଳ ଏକ ସୁବିଧା ନୁହେଁ ବରଂ ଏହା ସମ୍ବିଧାନ ପ୍ରଦତ୍ତ ‘ଜୀବନ ଧାରଣର ଅଧିକାର’ର ଏକ ଅଭିନ୍ନ ଅଙ୍ଗ।ସମସ୍ତ କାର୍ଯ୍ୟ ଶେଷ ହେବା ପରେ ମଧ୍ୟ ବିଦ୍ୟୁତ୍ ସଂଯୋଗ ନଦେବା ବିଦ୍ୟୁତ ଉପଭୋକ୍ତାଙ୍କ ଅଧିକାରର ସମ୍ପୂର୍ଣ୍ଣ ଉଲ୍ଲଙ୍ଘନ ଅଟେ। ମାନ୍ୟବର କମିଶନ
ଟି ପି ଏସ ଓ ଡିଏଲ ର କାର୍ଯ୍ୟକଳାପକୁ ସେବାରେ ଅବହେଳା ଦର୍ଶାଇବା ସହ ନିର୍ଦ୍ଦେଶ ପ୍ରଦାନ କରିଛନ୍ତି l ତୁରନ୍ତ ସଂଯୋଗ,ନିର୍ଦ୍ଦେଶ ପାଇବାର ୧୫ ଦିନ ମଧ୍ୟରେ ଆବେଦନକାରୀଙ୍କୁ ନୂତନ ବିଦ୍ୟୁତ୍ ସଂଯୋଗ ଯୋଗାଇ ଦେବାକୁ ବାଧ୍ୟତାମୂଳକ କରାଯାଇଛି। ଏହା ସହ ଉପଭୋକ୍ତାଙ୍କୁ ହୋଇଥିବା ମାନସିକ ଯନ୍ତ୍ରଣା ପାଇଁ କମ୍ପାନୀକୁ ୨୫,୦୦୦ ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ଦିଆଯାଇଛି l ଏହା ସହିତ ମାମଲା ପାଇଁ ହୋଇଥିବା ଖର୍ଚ୍ଚ ବାବଦକୁ ୭,୫୦୦ ଟଙ୍କା ପ୍ରଦାନ କରିବାକୁ କୋର୍ଟ କହିଛନ୍ତି। ଉପଭୋକ୍ତା ଅଦାଲତଙ୍କ ଏହି ରାୟ ସାଧାରଣ ଜନତାଙ୍କ ମଧ୍ୟରେ ଆଶାର ସଞ୍ଚାର କରିଛି ଏବଂ ସେବା ପ୍ରଦାନକାରୀ ସଂସ୍ଥାମାନଙ୍କ ପାଇଁ ଏକ ଚେତାବନୀ ସଦୃଶ ହୋଇଛି। ଏହି ନିଷ୍ପତ୍ତି ଫଳରେ ଗଞ୍ଜାମ ଜିଲ୍ଲାର ହଜାର ହଜାର ବିଦ୍ୟୁତ ଉପଭୋକ୍ତା ତଥା ଜନସାଧାରଣ ଉପକୃତ ହେବେ।
