ବୁଗୁଡ଼ା,୨୨।୦୭(ପୂର୍ଣ୍ଣଚନ୍ଦ୍ର ବାରିକ):ଗଞ୍ଜାମ ଜିଲ୍ଲା ବୁଗୁଡ଼ା ବ୍ଳକ ମୋଟାବାଡିରୁ ଖମାରପଲ୍ଲୀ ଯିବା ମୁଖ୍ୟ ରାସ୍ତାର ଖଦାଳସାହି ନିକଟରେ ରାସ୍ତାର ଶଙ୍ଖ ଭାଙ୍ଗି ଆଁ କରିଥିବାରୁ ଯାତ୍ରୀ ଓ ସ୍ଥାନୀୟ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ରାସ୍ତା ମଝିରେ ଏଭଳି ବିପଦପୂର୍ଣ୍ଣ ଅବସ୍ଥା ସୃଷ୍ଟି ହୋଇଥିବାରୁ ଯେକୌଣସି ସମୟରେ ବଡ଼ ଦୁର୍ଘଟଣା ଘଟିବାର ଆଶଙ୍କା ରହିଛି।ପ୍ରତିଦିନ ଏହି ରାସ୍ତା ଦେଇ ଶହ ଶହ ଲୋକ ଯାତାୟାତ କରୁଥିବାବେଳେ ଅନେକ ସମୟରେ ଅସୁବିଧାରେ ପଡ଼ୁଛନ୍ତି।ବିଶେଷକରି ରାତି ସମୟରେ ଏହି ସମସ୍ୟା ଆହୁରି ଭୟଙ୍କର ହୋଇପଡ଼ୁଛି। ରାସ୍ତାରେ ପର୍ଯ୍ୟାପ୍ତ ଆଲୋକ ବ୍ୟବସ୍ଥା ନଥିବାରୁ ଭାଙ୍ଗିଥିବା ଶଙ୍ଖ ଓ ଗାତ ଦୂରରୁ ଦେଖାଯାଉନାହିଁ। ଫଳରେ ଅଜଣା ଯାତ୍ରୀମାନେ ହଠାତ୍ ଗାତରେ ପଡ଼ି ଦୁର୍ଘଟଣାର ଶିକାର ହେଉଛନ୍ତି। ବର୍ଷା ହେଲେ ଏହି ଗାତରେ ପାଣି ଜମି ଯାଇ ସମସ୍ୟା ଆହୁରି ଜଟିଳ ହେଉଛି।ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଦୀର୍ଘଦିନ ଧରି ରାସ୍ତାର ଏହି ଅବସ୍ଥା ରହିଥିଲେ ମଧ୍ୟ ସମ୍ପୃକ୍ତ ବିଭାଗ ପକ୍ଷରୁ ସ୍ଥାୟୀ ପ୍ରତିକାର କରାଯାଇନାହିଁ। ରାସ୍ତା ନିର୍ମାଣ ଓ ରକ୍ଷଣାବେକ୍ଷଣ ପାଇଁ ସରକାରଙ୍କ ପକ୍ଷରୁ ବିଭିନ୍ନ ଯୋଜନା ରହିଥିଲେ ମଧ୍ୟ ଏଭଳି ଗୁରୁତ୍ୱପୂର୍ଣ୍ଣ ରାସ୍ତାର ଅବସ୍ଥା କାହିଁକି ଏଭଳି ହୋଇଛି ବୋଲି ଲୋକେ ପ୍ରଶ୍ନ କରିଛନ୍ତି।ମୋଟାବାଡିରୁ ଖମାରପଲ୍ଲୀ ଯାତାୟାତ ପାଇଁ ଏହି ରାସ୍ତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଛାତ୍ରଛାତ୍ରୀ, ଚାକିରିଜୀବୀ, ବ୍ୟବସାୟୀ, ଚାଷୀ ଓ ସାଧାରଣ ଲୋକେ ପ୍ରତିଦିନ ଏହି ରାସ୍ତା ଦେଇ ଯାତାୟାତ କରନ୍ତି। ରାସ୍ତାର ଏଭଳି ବିପଦପୂର୍ଣ୍ଣ ଅବସ୍ଥା ଯୋଗୁଁ ସମସ୍ତେ ଭୟଭୀତ ଅବସ୍ଥାରେ ଯାତାୟାତ କରୁଛନ୍ତି।ସ୍ଥାନୀୟ ଲୋକଙ୍କ ଅଭିଯୋଗ, ଏବେ ଯଦି ତୁରନ୍ତ ରାସ୍ତାର ଭାଙ୍ଗିଥିବା ଶଙ୍ଖକୁ ମରାମତି କରାନଯାଏ, ତେବେ ଆଗାମୀ ଦିନରେ ଏହା ବଡ଼ ଦୁର୍ଘଟଣାର କାରଣ ହୋଇପାରେ। ତେଣୁ ସମ୍ପୃକ୍ତ ବିଭାଗ ତୁରନ୍ତ ଘଟଣାସ୍ଥଳ ପରିଦର୍ଶନ କରି ଭାଙ୍ଗିଥିବା ଶଙ୍ଖର ମରାମତି କରିବା ସହ ରାସ୍ତାକୁ ସୁରକ୍ଷିତ କରିବାକୁ ଦାବି ହୋଇଛି।
