ଜଗନ୍ନାଥ ପ୍ରସାଦ,୨୫।୦୯ (ପୂର୍ଣ୍ଣଚନ୍ଦ୍ର ବାରିକ):ଗତ ଚାରି ଦିନ ଧରି “ଅର୍ଣ୍ଣବ” ପ୍ରଭାବରେ ଲଗାଣ ବର୍ଷା ଜାରି ରହିଥିବା ବେଳେ ଗଞ୍ଜାମ ଜିଲ୍ଲା ଜଗନ୍ନାଥ ପ୍ରସାଦ ଅଂଚଳ ରେ ମଧ୍ୟ ଲଗାଣ ବର୍ଷା ଯୋଗୁଁ ନଦୀ ଓ ନାଳର ଜଳସ୍ତର ବୃଦ୍ଧି ପାଇଥିବା ବେଳେ,ଜଗନ୍ନାଥ ପ୍ରସାଦ ବ୍ଲକ ଗାୟାଗଣ୍ଡା ପଞ୍ଚାୟତର ଦୁଇଟି ଆଦିବାସୀ ଗ୍ରାମ ନୁଆଁ ଜିରୀପଡା ଓ ନୁଆଁ ଦୂରଙ୍ଗୀ ସମ୍ପୂର୍ଣ୍ଣ ଭାବେ ଜଳବନ୍ଦୀ ହୋଇପଡ଼ିଛି। ଗ୍ରାମଗୁଡ଼ିକର ସଡ଼କ ସଂଯୋଗ ବିଚ୍ଛିନ୍ନ ହୋଇଥିବାରୁ ଲୋକମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ପାନୀୟ ଜଳ, ଖାଦ୍ୟ ସାମଗ୍ରୀ ଓ ଚିକିତ୍ସା ସେବା ପାଇବାରେ ଗ୍ରାମବାସୀ ଅସୁବିଧା ଭୋଗୁଥିବା ଅଭିଯୋଗ ହୋଇଛି।ସ୍ଥିତି ଗୁରୁତର ଥିବା ସତ୍ତ୍ୱେ ପ୍ରଶାସନିକ ଟିମ୍ ଏପର୍ଯ୍ୟନ୍ତ ଗ୍ରାମରେ ପହଞ୍ଚି ପାରିନଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଏଭଳି ପରିସ୍ଥିତିରେ ଏକସ୍ଥାନୀୟ ଗୋପବନ୍ଧୁ ଚାରିଟେବୁଲ ଟ୍ରଷ୍ଟ ର ସ୍ୱେଚ୍ଛାସେବୀ ମାନେ ଆଗକୁ ଆସି ଗ୍ରାମବାସୀଙ୍କୁ ଶୁଖିଲା ଖାଦ୍ୟ, ପିଇବା ପାଣି ଓ ଅନ୍ୟାନ୍ୟ ଜରୁରୀ ସାମଗ୍ରୀ ବଣ୍ଟନ କରିଛି। ସଂଗଠନର ସଦସ୍ୟମାନେ ଦୁର୍ଗମ ରାସ୍ତା ଅତିକ୍ରମ କରି ଲୋକଙ୍କ ପାଖରେ ପହଞ୍ଚି ସହଯୋଗ କରିଥିବାରୁ ଗ୍ରାମବାସୀ ସେମାନଙ୍କୁ କୃତଜ୍ଞତା ଜଣାଇଛନ୍ତି।ଗ୍ରାମବାସୀମାନେ ଶୀଘ୍ର ପ୍ରଶାସନ ପକ୍ଷରୁ ରିଲିଫ୍ ଓ ଆବଶ୍ୟକ ସହାୟତା ପହଞ୍ଚାଇବା ସହ ସ୍ଥାୟୀ ସମାଧାନ ପାଇଁ ଦାବି କରିଛନ୍ତି।
