ଚିକିଟି,୩୦/୩:(କୁରେସୁ ରେଡ୍ଡୀ):ଚିକିଟି ଅଞ୍ଚଳରେ ଏକ ଦୁଃଖଦ ସଡକ ଦୁର୍ଘଟଣା ଘଟି ଜଣେ ଯୁବତୀଙ୍କ ଜୀବନ ଚାଲିଯାଇଥିବାବେଳେ ୫ ଜଣ ଗୁରୁତର ଆହତ ହୋଇଛନ୍ତି। ଓଲପୁର ନିକଟରେ ପଲସର ବାଇକ ଓ ସ୍କୁଟି ମୁହାଁମୁହିଁ ହୋଇ ଧକ୍କା ହେବା ଫଳରେ ଏହି ଦୁର୍ଘଟଣା ଘଟିଛି।ସୂଚନା ଅନୁସାରେ, ଓଲପୁର ଗ୍ରାମର କିଛି ଯୁବକ କୌଣସି କାମରେ ଚିକିଟି ଯାଇ ଘରକୁ ଫେରୁଥିବା ସମୟରେ ବିପରୀତ ଦିଗରୁ ସୁବର୍ଣ୍ଣପୁର ଗ୍ରାମର ଝିଅ ପୂଜା ସାହୁ ସ୍କୁଟି ଚଳାଇ ତାଙ୍କ ମା’ ସସ୍ମିତା ସାହୁଙ୍କୁ ବସାଇ ଚିକିଟି ଯାଉଥିଲେ। ଏହି ସମୟରେ ଓଲପୁର ନିକଟରେ ଉଭୟ ଯାନ ମୁହାଁମୁହିଁ ହୋଇ ଭୟଙ୍କର ଧକ୍କା ଲାଗିଥିଲା।ଧକ୍କା ଏତେ ଜୋରଦାର ଥିଲା ଯେ ଉଭୟ ଯାନରେ ଥିବା ଲୋକେ ଦୂରକୁ ଛିଟିକି ପଡିଥିଲେ ଓ ସମସ୍ତେ ଗୁରୁତର ଭାବେ ଆହତ ହୋଇଥିଲେ। ସ୍ଥାନୀୟ ଲୋକେ ତୁରନ୍ତ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରିଥିଲେ।ଘଟଣା ପରେ ସମସ୍ତ ଗୁରୁତର ଆହତଙ୍କୁ ପ୍ରଥମେ ଚିକିଟି ମେଡିକାଲରେ ଭର୍ତ୍ତି କରାଯାଇଥିଲା। ତେବେ ସେମାନଙ୍କ ଅବସ୍ଥା ଗୁରୁତର ଥିବାରୁ ପରେ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି।ଏହି ଘଟଣା ପରେ ଚିକିଟି ମେଡିକାଲରେ ତୀବ୍ର ଉତ୍ତେଜନା ପରିଲକ୍ଷିତ ହୋଇଥିଲା। ଅଭିଯୋଗ ହେଉଛି ଯେ ମେଡିକାଲ ଅଧିକାରୀ ଡ଼. ମନୋଜ ପାଢ଼ୀ ଅନୁପସ୍ଥିତ ଥିବା ସହ ଆମ୍ବୁଲାନ୍ସ ସୁବିଧା ନଥିବାରୁ ଆହତମାନଙ୍କୁ ବଡ଼ ମେଡିକାଲକୁ ସ୍ଥାନାନ୍ତର କରିବାରେ ପ୍ରାୟ ୪୫ ମିନିଟ ବିଳମ୍ବ ହୋଇଥିଲା।ଏହି ବିଳମ୍ବକୁ ନେଇ ଆହତଙ୍କ ସମ୍ପର୍କୀୟ ଓ ସ୍ଥାନୀୟ ଲୋକେ ଚିକିଟି ମେଡିକାଲରେ ଉତ୍ତେଜିତ ହୋଇ ପ୍ରବଳ ହଙ୍ଗାମା କରିଥିଲେ। ଘଟଣାସ୍ଥଳରେ ଉତ୍ତେଜନା ଦେଖାଦେବା ପରେ ଚିକିଟି ତହସିଲଦାର ବିଶ୍ୱରଞ୍ଜନ କଂହର ଓ ବିଡ଼ିଓ ବିବେକାନନ୍ଦ ମିଶ୍ର ମେଡିକାଲରେ ପହଞ୍ଚି ସ୍ଥିତିକୁ ନିୟନ୍ତ୍ରଣ କରିବା ସହ ଲୋକଙ୍କୁ ବୁଝାସୁଝା କରିଥିଲେ।ପରେ ମହାପ୍ରୟାଣ ଗାଡ଼ି ଓ ଜନନୀ ସୁରକ୍ଷା ଗାଡ଼ି ବ୍ୟବସ୍ଥା କରି ଗୁରୁତର ଆହତମାନଙ୍କୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯିବା ପରେ ଉତ୍ତେଜନା ହ୍ରାସ ପାଇଥିଲା।ଏହି ଦୁର୍ଘଟଣାରେ ଗୁରୁତର ଆହତ ହୋଇଥିବାମାନେ ହେଲେ ଓଲପୁର ଗ୍ରାମର ପବିତ୍ର ବେହେରା, ତୁଳସୀ ବେହେରା, ବିଶାଲ ବେହେରା (୮) ଏବଂ ସୁବର୍ଣ୍ଣପୁର ଗ୍ରାମର ପୂଜା ସାହୁ ଓ ସସ୍ମିତା ସାହୁ।ଦୁର୍ଘଟଣା ପରେ ଚିକିତ୍ସାଧୀନ ଅବସ୍ଥାରେ **ପୂଜା ସାହୁ (୧୮)**ଙ୍କ ଦୁଃଖଦ ମୃତ୍ୟୁ ଘଟିଛି। ଏହା ସହ ଅଞ୍ଚଳରେ ଶୋକର ଛାୟା ଖେଳିଯାଇଛି।ଏହି ଘଟଣା ପରେ ଚିକିଟି ତହସିଲଦାର ବିଶ୍ୱରଞ୍ଜନ କଂହର ବ୍ରହ୍ମପୁର ବଡ଼ ମେଡିକାଲରେ ପହଞ୍ଚି ମୃତକଙ୍କ ସମ୍ପର୍କୀୟଙ୍କୁ ରେଡକ୍ରସ ପାଣ୍ଠିରୁ ୩୦ ହଜାର ଟଙ୍କା ଅର୍ଥ ସହାୟତା ପ୍ରଦାନ କରିଛନ୍ତି। ସେହିପରି ଅନ୍ୟ ଗୁରୁତର ଆହତମାନଙ୍କୁ ୧୦ ହଜାର ଟଙ୍କା ଲେଖାଏଁ ରେଡକ୍ରସ ପାଣ୍ଠିରୁ ପ୍ରଦାନ କରାଯାଇଥିବା କଥା ତହସିଲଦାର ଶ୍ରୀ କଂହର ସୂଚନା ଦେଇଛନ୍ତି।ଏହି ଘଟଣା ସନ୍ଦର୍ଭରେ ପୁଲିସ ଦୁର୍ଘଟଣାଗ୍ରସ୍ତ ବାଇକ ଓ ସ୍କୁଟିକୁ ଜବତ କରିଥିବାବେଳେ ଘଟଣାର ତଦନ୍ତ ଜାରି ରଖିଛି।ସ୍ଥାନୀୟ ଲୋକଙ୍କ କହିବା ଅନୁସାରେ, ଓଲପୁର ନିକଟରେ ରାସ୍ତା ଅଞ୍ଚଳରେ ଗାଡ଼ି ଦ୍ରୁତ ଗତିରେ ଚାଲିବା ଓ ସଚେତନତା ଅଭାବରୁ ବାରମ୍ବାର ଦୁର୍ଘଟଣା ଘଟୁଛି। ଏପରି ଦୁର୍ଘଟଣାକୁ ରୋକିବା ପାଇଁ ପ୍ରଶାସନ ଓ ପୁଲିସ ପକ୍ଷରୁ ଗତି ନିୟନ୍ତ୍ରଣ ଓ ସଚେତନତା କାର୍ଯ୍ୟକ୍ରମ ଜରୁରୀ ବୋଲି ଅଞ୍ଚଳବାସୀ ଦାବି କରିଛନ୍ତି।ଦୁର୍ଘଟଣା ପରେ ଏହି ଅଞ୍ଚଳରେ ଲୋକମାନେ ଶୋକାକୁଳ ହୋଇପଡିଥିବାବେଳେ, ଚିକିଟି ମେଡିକାଲରେ ଆମ୍ବୁଲାନ୍ସ ଓ ଚିକିତ୍ସା ସୁବିଧା ଅଭାବକୁ ନେଇ ପ୍ରଶାସନ ଉପରେ ପ୍ରଶ୍ନ ଉଠିଛି।
